वरदहस्तामुळेच गुटखा व सुगंधी तंबाखुची विक्री व तस्करी बिनदिक्कत,कारवाईच्या धास्तीने घरीच थाटला अवैध मालाचा 'संसार'

*वरदहस्तामुळेच गुटखा व सुगंधी तंबाखुची विक्री व तस्करी बिनदिक्कत*

*कारवाईच्या धास्तीने घरीच थाटला अवैध मालाचा 'संसार'*

पाथरी: गुटखा व सुगंधी तंबाखू विक्री व तस्करीचा धंदा परिसरात बिनबोभाट सुरू असून या संपूर्ण तस्करीत अन्न व औषध प्रशासन, वाहतूक पोलीस, स्थानिक पोलिस अशी साखळी असल्याने क्वचितच कारवाईचा फार्स केला जातो. महत्त्वाचं म्हणजे कारवाई करतानाही मोठ्या माशांना धक्का न लावता केवळ छोट्या माशांवर थातुरमातूर कारवाई दाखवली जाते.

    2012 साली सरकारने गुटखा बंदी कायदा लागू केला. त्यानुसार गुटख्यावर जरी बंदी असली तरी प्रक्रिया केलेल्या तंबाखूवर तसेच सुगंधी तंबाखूवर मात्र बंदी नव्हती. 2015 साली सरकारने प्रक्रिया केलेला तंबाखू तसेच सुगंधी तंबाखू याच्या विक्री तसेच तुंबाखुच्या प्रक्रियेवर बंदी घातली. मात्र अन्न व औषध प्रशासनाच्या वरीष्ठ अधिकारी व स्थानिक पोलिस यंत्रणेच्या आशीर्वादाने हा कारभार बिनदिक्कत सुरू आहे.

      गुटखा व सुगंधी तंबाखुच्या तस्करी व अवैध विक्रीमध्ये दोन मोठ्या व्यापा-यांची चलती आहे. सिनेमाची कथा शोभावी अशी या दोन्ही सम्राटाच्या अवैध व्यवसायाची कहाणी आहे. या दोघांचेही आपसात पटत नसल्याने यांच्यामध्ये दोन गट तयार झाले आहेत. यातला एक सुगंधी तंबाखू विक्री व तस्करीच्या व्यवसायात आहे. तर दुसरा गुटखा व नकली सुगंधी तंबाखूच्या विक्रीचा किंग मानला जातो. दोघांचे पटत नसल्याने हे दोघंही एकमेकांपासून माल घेत नाही. त्यामुळे सोनपेठ मार्गाने तर कधी माजलगाव मार्गे सुंगधी तंबाखू  गुटखा पाथरीत पोहचतो.

प्रशासनाची कारवाई होऊ नये यासाठी दुकानाऐवजी घरीच या मालाची साठवणूक केली जात आहे.पाथरी येथिल गुलशन नगर भागात,पठान मोहल्ला इतकेच नव्हे तर चक्क पोलिस स्टेशनच्या हाकेच्या अंतरातुन या गुटख्याची तस्करी करण्यात येते. पाथरीतल्या काही भागातल्या स्वत:च्या बंगल्यामध्ये या मालाची मोठ्या प्रमाणात साठवणूक केली जाते. इथेच तंबाखूवर प्रक्रिया सुद्धा केली जात असल्याची शक्यता नाकारता येत नाही. साठवणूक केलेल्या मालाचे वितरण हे अतिशय गुंतागुंतीचे व जोखीमेचे काम आहे. त्यामुळे तस्कर वितरणासाठी थेट काही व्यक्तींची मदत घेतली आहे.

अवैध व्यवसायाला प्रशासनाचा वरदहस्त ? 

या व्यवसायात दोन/तिनं गट असल्याने याची वसुलीही वेगवेगळी होते. यात एक गट हा वेगळे गावज आधी तर दुसरा गट वेगळी गावे नंतर तर तिसरा गट हा शहरात कार्यरत आहे.तिन्हही  गटाची वसुली ही वेगवेगळी होते. हे काम सुरळीत चालावे यासाठी स्थानिक खाकीसह परभणी येथील अधिकाऱ्याला रसद पुरवली जाते. तसेच अन्न व औषधी प्रशासनाच्या एका अधिकाऱ्यालाही महिन्याकाठी विशिष्ट वाटा पुरवला जात असल्याची माहिती आहे.